18

കൊച്ചി: വില്ലിംഗ്ടൺ ഐലൻഡിലും സമീപ പ്രദേശങ്ങളിലും പാർക്ക് ചെയ്തിട്ടുള്ള കണ്ടെയ്നർ ലോറികളിൽ നിന്നും ട്രെയിലറുകളിൽ നിന്നും ബാറ്ററികൾ മോഷണം നടത്തി വന്നിരുന്ന രണ്ടു പേർ അറസ്റ്റിൽ.

എറണാകുളം നെട്ടൂർ കളത്തിപറമ്പിൽ വീട്ടിൽ ഷൈജു (39), ചോറ്റാനിക്കര കുരീക്കാട് ചാണയിൽ വീട്ടിൽ ഷഹീർ (36) എന്നിവരാണ് ഹാർബർ പൊലിസിന്‍റെ പിടിയിലായത്.

അഞ്ചിന് പുലർച്ചെ രണ്ടിന് വില്ലിംഗ്‌ടൺ ഐലൻഡ് - മട്ടാഞ്ചേരി ഹാൾട്ടിൽ റോഡരികിൽ പാർക്ക് ചെയ്തിരുന്ന ഐസിടി ട്രാൻസ്പോർട്ടിംഗ് കമ്പനിയുടെ കണ്ടെയ്നർ ലോറിയിൽ നിന്നും 11,000 രൂപ വിലവരുന്ന ബാറ്ററികൾ പ്രതികൾ മോഷ്ടിക്കുകയായിരുന്നു.

ഡിസിപി മോഹിത് റാവത്തിന്‍റെ നേതൃത്വത്തിൽ ഹാർബർ പൊലിസ് സ്റ്റേഷൻ എസ്എച്ച്ഒ എ. അജിത്ത്, ടൗൺ സൗത്ത് എസ്എച്ച്ഒ റിജിൻ എം. തോമസ് എന്നിവരുടെ നേതൃത്വത്തിലുള്ള പൊലിസ് സംഘമാണ് പ്രതികളെ അറസ്റ്റ് ചെയ്തത്.

കൊച്ചി മജിസ്ട്രേറ്റ് കോടതിയിൽ ഹാജരാക്കിയ പ്രതികളെ കോടതി റിമാൻഡ് ചെയ്തു.